Okkum tørva fleiri fosturheim í Norðoyggjum
05. juli 2016
Kundu tit hugsað tykkum at gjørt mun fyri eitt barn, sum tørvar eina hjálpandi hond? Lat okkum so frætta frá tykkum!
Eitt fosturheim er ein familja, sum hevur børn og ung búgvandi hjá sær til fosturs. Meðan barnið er til fosturs, fylgja barnaverndartænastan og Fosturforeldraskipanin við støðuni og vitja í fosturheiminum.
Talan kann eisini verða um at hava børn til umlættingar í styttri tíðarskeið, eitt nú í vikuskiftum. Endamálið við umlætting er at veita foreldrum, sum vanliga hava eitt gott samband við barnið, men sum ikki hava orku til at ansa barninum alla tíðina, umlætting.
Tá tit gerast fosturforeldur …
• Geva tit einum barni umsorgan og tryggleika, og lata heimið upp fyri tí
• Gera tit tykkara egna gerandisdag ríkari
• Kunnu tit gleðast um at síggja eitt barn vaksa og menna seg
Setið tykkum í samband við Barnaverndarstovuna, tlf. nr. 302480, so kunnu vit práta nærri. Ella send ein teldupost til bvs@bvs.fo.
