Gerst fosturforeldur
Er áhugi fyri at gerast fosturforeldur, ber til at venda sær til Fosturforeldraskipanina á Barnaverndarstovuni. Her fæst kunning um tørvin á fosturforeldrum, góðkenningartilgongdina, útbúgving, stuðul o.s.fr. Áðrenn umsóknin verður viðgjørd, skulu umsóknarskjøl fyllast úr.
Tá Fosturforeldraskipanin hevur fingið umsóknina, byrjar góðkenningartilgongdin. Familjuviðurskifti verða kannað, og mett verður um, hvørt treytir og førleikar til at gerast fosturforeldur eru loknar.
Fosturforeldur skulu eisini á lógarásett skeið fyri fosturforeldur.
Verður tú/tit góðkend til uppgávuna, verður tú/tit skrásett í skipanini. Avtala verður gjørd millum teg/tykkum og Fosturforeldraskipanina um at vera tøk at taka ímóti einum barni, tá tørvur er á tí. Fosturforeldur til tað einstaka barnið verða altíð vald út frá tørvinum hjá barninum.
Týdningarmikið er at fyrireika seg væl til uppgávuna sum fosturforeldur. Tí er gott at hava umhugsað og umrøtt ymisk viðurskifti, sum kunnu gera seg galdandi í fosturfamiljum.